Фейк: «Адамдарды өлтіру үшін йод препараттарын ішуге мәжбүрлейді»
Қазнетте адамдар денсаулығына орны толмас зиян келтіру үшін йод препараттарын ішуге мәжбүр деген ақпарат тарады. Соңғы екі жылда ішінде қалаларда алюминий шашқан, ал адамдар онымен дем алған. Енді ағзада оның концентрациясы көбейген кезде, металл йодпен әрекеттесіп, дененің ішінде тікелей жануы мүмкін. Мұның бәрі ғылымға қарсы.
Бұл ақпарат химтрейлдер – атмосфераға улы заттар шашу туралы қастандық теориясына негізделген. Біз оны бірнеше рет жоққа шығардық. Ұшақтардың бір кездері химиялық заттарды, әсіресе алюминийді шашқанына дәлел жоқ. Яғни, соңғы бірнеше жылда алюминий шашу жағдайлары болды дегенге сенуге ешқандай негіз жоқ.
Адамдарды йод препараттарын ішуге итермелейтіні туралы хабарлама жалған. Бұл препараттарды барлық қажетті сынақтардан кейін дәрігердің нұсқауы бойынша ғана қабылдауға болады. Қазақстанда йодты мәжбүрлеп қабылдау мәселесі жоқ.
Хабарламада айтылған алюминий мен йодтың өзара әрекеттесу реакциясының адам ағзасында жүруі мүмкін емес.
Тәжірибеде алюминий жоңқасы мен йод кристалдары қолданылады, ал катализаторы су болады. Йод сумен әрекеттесіп, алюминий оксидінің қабығын ерітетін йод сутегі қышқылын түзеді. Содан кейін йод пен алюминийдің тікелей реакциясы басталады, оның барысында жылу мен күлгін йод булары бөлінеді.
Адам ағзасында алюминий жоңқасы, йод кристалдары немесе таза су жоқ. Сондықтан ағзада мұндай реакцияның болуы мүмкін емес.
Алюминий адам ағзаларында кездеседі. Ересек адамның денесінде оның мөлшері шамамен 30-50 мг құрайды. Ол бұлшықеттерде, бауырда, өкпеде және басқа тіндерде болады.
Йод та адам ағзасында бар. Әдетте, ересек адамның тіндерінде оның мөлшері – 20-50 мг. Йод ең жоғары мөлшерде қалқанша безде шоғырланған. Сондай-ақ бұл элемент қан мен бұлшықеттерде болады.
Осы екі заттың өзара әрекеттесуінде ағза үшін жойқын реакция болмайтыны анық.
Демек, таралған ақпарат екі жалған мәлімдеме мен манипуляцияға негізделген. Қалаларда алюминий шашылған жоқ, ал адамдарды йод препараттарын ішуге итермелемейді. Йод пен алюминийдің химиялық реакциясы адам ағзасында жүруі мүмкін емес.
