Жаңалықтар

Климаттық қарудан табиғи апаттар болмайды

Қазнет қолданушылары әлемдік үкімет пен Билл Гейтс климаттық қару қолданылуы мүмкін екендігін талқылауда. Шын мәнінде, климаттық қару – бұл жорамал және қастандық теорияларын жақтаушылардың сүйікті тақырыбы.


Қазақстандықтардың талқысына түскен постат дауыл бейнеленген және «климаттық қару» терминіне анықтама ұсынылған. Анықтама мәтіні толықтай Википедиядан көшірілген. Бір ғана ерекшелігі бар. Жарияланымның авторы одан «гипотетикалық» деген сөзді алып тастаған. Онлайн энциклопедиядағы бұл терминнің түпнұсқа анықтамасында «табиғи ресурстарға, елдің, мемлекеттің, материктің, континенттің ауа райы мен климатына зиянды фактор ретінде жасанды әсер ететін жеке елдің немесе елдер тобының экономикасын жаппай қырып-жоюдың және жоюдың гипотетикалық қаруы. Оны «іске қосу» тетігі ретінде әртүрлі технологиялар мен құралдарды, қолдан жасалған техногендік апаттарды, экологиялық апаттарға әкеліп соғатын және нәтижесінде экономикалық проблемалар туғызатын құралдарды қолдануға болады» деп жазылған.
Тарихта адамның ауа райына әсер етуге тырысқан әрекеттері туралы деректер бар. Бірақ нәтижені болжау мүмкін еместігіне, қысқа мерзімді әрекетіне және көп шығынды қажет ететініне байланысты оларды «қару» деп атай алмаймыз.
Оның үстіне, жойқын дауыл мен су тасқынын тудыратын қару бір күні ойлап табылса, 1976 жылы қабылданған БҰҰ-ның «Табиғи ортаға әсер ету құралдарын әскери немесе кез келген дұшпандық пайдалануға тыйым салу туралы» конвенциясына сәйкес, оны қолдануға болмайды.
Қазіргі заманда нақты дамыған немесе қолданылатын климаттық қару туралы ештеңе айтылмаған. Сонымен қатар, метеорология адамзатқа осындай қаруды жасауға мүмкіндік беретіндей дәрежеде дамымаған.
Билл Гейтстің өзінің блогында табиғи апаттар туралы айтқаны рас. Алайда, ол апат тудыру үшін қандай да бір қару әзірленіп, пайдаланылатыны туралы жазған жоқ. Ол қоршаған ортаның ластану дәрежесіне және адамның оған теріс әсерін тигізетініне негізделген пайымын жеткізген.
Қорыта айтқанда, климаттық қару да, оны жасауға Гейтстің қатысы бар екендігі де жорамалдарға ғана негізделген ешқандай дәлелдері жоқ қастандық теориясы болып табылады.

 

Фейктерді әшкерелеу біздің Stopfake.kz Telegram-арнамызда. Бірден шындықты білгіңіз келсе, жазылыңыздар.

Басқа жаңалықтар

Back to top button