Фейк: «Электромобильдің ішіне отыру қауіпті»
Әлеуметтік желілерде тараған видеода автор электромобильдің ішінде отырудың қауіпті екенін айтады. Мұндай көлік денсаулыққа қауіпті күшті сәулеленудің көзі болып табылады екен. Бұл рас па? Анықтайық.
Хабарламаға тіркелген видеода ер адам ұялы телефоннан, тоңазытқыштан, микротолқынды пештен және Tesla электромобилінен шыққан сәулелену деңгейін өлшейді. Өлшеу нәтижелері көліктің ішінде отыру қауіпті екенін дәлелдейді екен. Шын мәнінде, кадрлар контекстен үзіп алынған.
Дереккөз – Heads of Tech YouTube-каналы. Tesla көлігінің ішіндегі өлшеулер туралы ролик 2022 жылдың 3 маусымында шыққан. Роликтің толық нұсқасы 13 минут 32 секундқа созылады және онда автор барлық өлшеулерді милливаттпен есептейтінін және құрылғы машинаның ішінде көрсеткен көрсеткіштер рұқсат етілген нормалардан аспайтынын, сондай-ақ телефонмен сөйлескенде немесе сымсыз құлаққаптарды пайдаланғанда құрылғыда көрсетілген көрсеткіштерге шамамен тең екенін айтады.
Демек, Қазнетте таралған үзінді оның мағынасын бұрмалау үшін контекстен әдейі үзіп алынған.
Электромобильдердің сәуле шығаруы Желіде көп талқыланады. Оны түсіну үшін сәулеленудің екі түрі болатынын білген жөн: иондаушы және иондаушы емес. Сәулеленудің бірінші түрін «радиация» деп те атайды. Мұндай сәулелер радиоактивті элементтерден, рентген аппараттарынан және басқа да медициналық жабдықтардан шығады.
Иондаушы емес сәулелену – бұл электр плитасы, микротолқынды пеш, теледидар және т.б. тұрмыстық техникадан шығатын көзге көрінетін жарық, жылу, радиотолқындар, электромагниттік сәулелер.
Электромобильдер иондаушы емес сәуле шығарады. Яғни, белгілі бір дозаларда адамдардың өмірі мен денсаулығына қауіпті емес.
Электр көліктеріндегі сәулелену деңгейін Желіде жеке блог жүргізетін әуесқой көлік жүргізушілері де, ғалымдар да өлшеген.
Олар электр көлігінің салонындағы сәулелену деңгейі ықтимал қауіпті деңгейдің 20%-нан аспайды, яғни денсаулыққа ешқандай зиян келтірмейді деген қорытындыға келді.
Демек, электромобильдің ішінде отыру қауіпсіз. Таралған ролик контекстен үзіп алынған және электр көлігінің ішінде отырудың қауіпті екенін дәлелдемейді.
