«Беларусь полигонында өтетін оқу-жаттығуға Қазақстаннан бақылаушылар қатысады»: ҚР Қорғаныс министрлігінің түсініктемесі
Әлеуметтік желілерде Қазақстанның Беларусьтегі әскери оқу-жаттығуларға қатысатыны талқылануда. Пайдаланушылардың айтуынша, іс-шара «наразылықтарға» қарамастан өткізіледі. ҚР Қорғаныс министрлігі өзінің түсініктемесінде шамамен екі жыл бұрын жоспарланғандықтан «бұл оқу-жаттығудың Беларусьтегі ішкі саяси жағдайға қатысы жоқ» екендігін атап өтті.
«Мызғымас бауырластық – 2020» командалық-штабтық оқу-жаттығуы 2012 жылдан бері жыл сайын өткізіліп келеді. Биыл шара 12-16 қазан аралығында Беларусь мемлекетенде Лосвидо полигонында өтеді.
«2020 жылы оқу-жаттығуды Беларусь Республикасының аумағында өткізу ҰҚШҰ Қорғаныс министрлері кеңесі мен Қауіпсіздік кеңестері хатшылары комитетінің 2018 жылғы 8 қарашадағы шешімімен бекітілген ҰҚШҰ Ұжымдық қауіпсіздік жүйесінің күштері мен құралдарын басқару органдары мен құралымдарын 2025 жылға дейінгі кезеңге бірлескен даярлау іс-шараларының тізбесінде қарастырылған», – деп хабарлады Қорғаныс министрлігінің Ақпарат және коммуникациялар департаментінің өкілі майор Ғани Нүсіпов Tengrinews-тің жолдаған сауалына.
Оның айтуынша, Қазақстаннан оқу-жаттығуға бақылаушы ретінде бірнеше адам қатысады. Олар бітімгершілік операцияларды ұйымдастыру тәжірибесі мен ерекшеліктерін зерттейтін жедел топтың құрамына кіреді.
«Бұл жаттығудың Беларусбтегі ішкі саяси жағдайға қатысы жоқ», – деп түсіндірді Ғани Нүсіпов.
ҰҚШҰ – Ұжымдық қауіпсіздік туралы шарт ұйымы. Ұйымға қатысушы елдер – Армения, Беларусь, Қазақстан, Қырғызстан, Ресей және Тәжікстан.
Бұған дейінгі «Мызғымас бауырластық» оқу-жаттығуы 2019 жылы Тәжікстанда өткен болатын.
***
Бүгін, 16 қыркүйекте, ҚР Қорғаныс министрлігі Тәуелсіз Мемлекеттер Достастығына қатысушы мемлекеттердің әуе шабуылына қарсы қорғаныс біріккен жүйесінің басқару органдары мен кезекші күштерінің жауынгерлік әзірлігін тексеру аяқталғанын хабарлады.
«Жаттығу шеңберінде өзара іс-қимыл жасайтын тараптардың бұзушы әуе кемелері бойынша кезекші күштерді қолдану, достастық мемлекеттерінің әуе кеңістігін пайдалану мәселелері пысықталды», – деп мәлімдеді әскери ведомстводағылар.
