Жалған: «Вакцина мутацияланған коронавирустан қорғамайды»
Қазнетте Александр Редьконың видеосы тарады. Вакцинацияға қарсы ресейлік азамат SARS-CoV-2 вирусының мутациялануына байланысты вакциналар әсер етпейді, сондықтан екпе салдырудың қажеті жоқ дейді. Бұл өтірік.
Александр Редько өзін дәрігер және профессор деп атайды. Іс жүзінде ол Ресей жаратылыстану академиясының академигі. Бұл мемлекеттік Ресей Ғылым Академиясына (РҒА) баламасы. Оған кіру үшін ақшалай жарна төлеу қажет. Ұйым мүшелерінің арасында конспирологтар мен антиваксерлер көп. Цирк артисі Куклачев пен саясаткер Михаил Горбачев те аталған академияның академигі болып табылады.
Редько коронавирустық инфекция пандемиясы кезінде ғылымға қарсы теорияларды белсенді түрде алға тартты. Оның айтуынша, вакцинация деп адамдарға іс жүзінде аденовирус жұқтырылады, ал балаларда вакцинация салдарынан табиғи иммунитет жойылады.
Оның мәлімдемелерін көптеген фактчекерлер, соның ішінде біздің сайт та жоққа шығарды.
Вирустардың генетикалық коды шынымен де өзгеріске ұшырайды. Ғалымдар мұны мутация деп атайды. Иллинойс университетінің Пеория медицина колледжінің жұқпалы аурулар бөлімінің меңгерушісі Дуглас Каспердің айтуынша, мутациядан қорқудың қажеті жоқ, өйткені бұл табиғи процесс.
Тірі қалу және көбею үшін вирусқа қожайын қажет. Бұл адам немесе жануар болуы мүмкін. Ағзаға енгеннен кейін вирус өзінің генетикалық материалының (РНҚ) қожайынның жасушаларымен байланысуына мүмкіндік береді. Содан кейін қожайынның жасушалары генетикалық кодты оқып, оны көшіре бастайды. Осылайша одан да көп вирустық жасушалар қалыптасады. Генетикалық код ақуыздарға ауысқанда, оның бір бөлігі өзгереді. Бұл жиі болатын мутация.
COVID-19 тудыратын вирус та мутацияға ұшырайды. Бірақ ғалымдар бұған дайын. SARS-CoV – 2 – коронавирустардың үлкен тобының бір бөлігі. Зерттеушілер вирустың атауына негіз болған тікенекті ақуыздардың көптеген вариацияларын байқады. Вакцинаны әзірлеушілер оларды тікенді ақуыздың әртүрлі нұсқаларында сынап көрді. Сондықтан біздің иммундық жүйеміз вакцинациядан кейін, вирус мутацияға ұшыраса да, антигенді таниды және оған міндетті түрде жауап береді.
Вакцинация 20 миллионға жуық өлімнің алдын алды. Сарапшылардың бағалауынша, COVID-19 қарсы иммундаусыз өлім-жітім үш есе, ал ауруханаға жатқызу жағдайлары бес есе жоғары болатын еді.
Редьконың SARS-CoV-2 вирусының мутациялануына байланысты вакциналар әсер етпейді деген пікірін ғалымдар жоққа шығарады. Коронавирустың барлық мутациялары шамалы. Вакцина әлі де COVID-19 барлық белгілі штаммдарынан қорғайды.
