Астана қаласының Полиция департаменті алаяқтықтың жаңа түрі туралы ескертеді
Қазақстандықтар Астана қаласы Полиция департаментінің алаяқтықтың жаңа түрі туралы хабарламасын таратуда. Бұл шынымен, мемлекеттік ведомствоның хабарламасы. Осылайша ескерте отырып, полицейлер азаматтарды алаяқтардың айласынан сақтандырмақ.
Астана қаласы Полиция департаментінің баспасөз қызметі бұл ақпаратқа қатысты түсініктеме берді.
«Алаяқтар WhatsApp және Telegram мессенджерлері арқылы өздерін мемлекеттік мекемелердің басшылары ретінде таныстырып, олардың фотосуреттері мен видеоларын пайдаланады және құқық бұзушыларды ұстау бойынша арнайы операция жүргізіліп жатыр дейді. Одан әрі олар сізді қылмыскерлерді ұстауға қатысуға шақырады.
Мысалы, алаяқтар нейрожеліні пайдаланып, Астана қаласы ПД бастығының бірінші орынбасары Эльдар Данияровтың келбетін көшіре отырып, бейнебайланыс арқылы қоңырау шалады. Осыдан кейін тергеу әрекеттері жүргізіліп жатқанып айтып, психологиялық қысым жасау арқылы азаматтарды өздерінің жеке жинақтарын Ұлттық банктің сақтандыру шоттарына аударуға итермелейді. Сонымен қатар, алаяқтар азаматтарды өз мүлкін сатуға, қарыз алуға және түскен қаражатты жеке шоттарға аударуға көндіреді.
Мұндай жағдайларда әңгімені тоқтатып, «102» нөміріне хабарласуыңызды сұраймыз. Сақ болыңыз және алаяқтардың мұндай қулықтарына ден қоймаңыз», – делінген Астана қаласының Полиция департаменті баспасөз қызметінің хабарламасында.
Бұл алаяқтық әрекет туралы «Қостанай жаңалықтары» өңірлік газеті өзінің әлеуметтік желілерінде жазған.
«Лисаков қаласының журналисіне мессенджер арқылы ҰҚК тарапынан Журналистер одағында тексеру жүргізіліп жатқандығы және жақын арада оған қызметкерлер хабарласатыны туралы хабарлама келіп түскен. Әңгімелесуші өзін Қазақстан Журналистер одағы басқармасының төрағасы Сейітқазы Матаев деп таныстырып, ескерту мақсатында жазып отырғанын айтқан. Аватарға да аталған адамның суреті қойылған. Журналист Матаевтың қазіргі лауазымын ойламастан (бұл нақты адам), мұндай ескертуге күмәнмен қараған. Одан әрі алгоритм бойынша әртүрлі «органдардан» біреулер хабарласып, «облыстық полиция департаментінің қызметкерінен» бейне қоңырау келіп түседі. Алаяқтар жәбірленушінің шоттарынан арнайы әскери операцияға қомақты сома аударылғанын, енді оған қатысты терроризмді қолдау туралы бап бойынша қылмыстық іс қозғалғанын айтады. Жалған тәртіп сақшысы оның кінәсіздігін дәлелдеу үшін онлайн карта ашу керек дейді. Алаяқтар облыстың атауын атай алмай қолға түскен», – деді Қостанай облысы ПД киберқылмысқа қарсы күрес бөлімінің бастығы полиция капитаны Олжас Магыпаров «Қостанай жаңалықтары» порталына.
