ҚР Денсаулық сақтау министрлігі қазақстандық мектептерде КВИ қарсы вакцинасы бар пластырь туралы қауесетті жоққа шығарды
Қазнетте тараған видео роликтің кейіпкері әлемнің барлық елдеріне COVID-19 қарсы вакцинасымен инесі бар пластырь жеткізілген деп мәлімдейді. Олар мектептерге әкелінген және балалар жасырын түрде егіледі екен. Мұның бәрі жалған.
Ғалымдар соңғы ондаған жыл бойы вакцинасы бар пластырь жасауда. Оның мәні вакциналарды осындай жапсырмалармен тері арқылы инъекциясыз енгізу. Бұл салада бірнеше әртүрлі әзірлеме бар, соның ішінде COVID-19 қарсы вакцинасы бар пластырь бойынша да.
Бүгінгі күні әлемнің ешбір елінде мұндай технология мақұлданбаған және клиникалық сынақтардан тыс адамдарда қолданылмайды.
Қазақстанда да мұндай вакциналық пластырь жоқ. Оны ҚР Денсаулық сақтау министрлігі растады.
«ҚР ДСМ санитарлық-эпидемиологиялық бақылау комитеті әлеуметтік желілерде тараған инесі бар пластырь туралы ақпарат шындыққа жанаспайтынын және фейк болып табылатынын хабарлайды. Балаларды вакцинациялау оның заңды өкілдерінің ақпараттандырылған ерікті келісімімен ғана жүргізіледі. Сондықтан жалған (фейк) ақпарат таратпауларыңызды сұраймыз, ресми дереккөздерден тараған ақпаратты ғана пайдалануға шақырамыз», – деп хабарлады ведомствоның баспасөз қызметінен.
Демек, таралған хабарлама фейк. Елімізде вакцинасы бар пластырь жоқ, ал балалар мен ересектерді ақпараттандырылған ерікті келісімінсіз егу заңсыз болып табылады.
