Фейк: «Оргон энергиясы өмір сүру ұзақтығын арттырады»
Интернетте оргон энергиясын зерттеу туралы видео тарады. Бұл тәжірибеде қанның гемокоагуляциясы салыстырылған. Қанның бір бөлігі қалыпты жағдайда болды, ал екіншісін оргономия теориясының негізін қалаушы Вильгельм Райхтың машинасына салған. Нәтижесінде, зерттеу «машинасындағы» қан басқа үлгіге қарағанда 60-70% баяу ыдырайтынын көрсетті. Егер энергия қанды сақтау мерзімін ұзартса, онда ол адамның да өмірін ұзарта алады екен. Бірақ бұл олай емес.
Гемокоагуляция немесе қанның ұюы – бұл қанның сұйық күйден желеге айналу процесі, осыдан кейін онда мөлдір сары сұйықтықпен тығыз ұйыған қан пайда болады.
Оргономия – 1930 жылы психоаналитик Вильгельм Рыйх ойлап тапқан псевдоғылыми тұжырымдама. Теория оргон деп аталатын ғарыштық энергияның болуына негізделген. Райхтың пікірінше, ағзадағы бұл энергияның жетіспеушілігі көптеген аурулардың, соның ішінде онкологиялық аурулардың туындауына себеп болады.
Сонымен қатар Рейх қоршаған ортадан оргон энергиясын жинайтын құрылғы құрастырған. Ол ағаш қораптан, металл қабаттардан және қой жүнінен жасалды.
Райхтың құрылғысы жұмыс істеген жоқ, ал оргон энергиясы адамдардың ауруын емдемеді. Оның ішінде қатерлі ісікті де. Сонымен қатар оргон энергиясының және оның емдік қасиеттерінің бар екендігіне ғылыми дәлелдер жоқ.
Зерттеуге келетін болсақ, оны өздерін Грекия оргономия институтына (Hellenic Institute of Orgonomy) жатқызатын Райхтың шәкірттері жүргізген. Бұл ұйымның сайтында оның оқу және зерттеу институты болып табылатыны жазылған. Алайда оның «жоғары мекеме» ресми мәртебесі жоқ.
Жүргізілген зерттеу бойынша сенімді дереккөздерде – рецензияланған ғылыми жұмыстарды жариялайтын ғылыми журналдарда жарияланымдар жоқ. Оның нәтижелері дәлелденбеген және тексерілмеген. Демек, оргон энергиясы өмірді ұзартатыны туралы мәлімдеме шындыққа жанаспайды. Оның үстіне, энергияның өзі дәлелденбеген.
Сонымен қатар АҚШ-тың Азық-түлік және дәрі-дәрмек сапасын қадағалау басқармасына (FDA) жүгінгеннен кейін оргонға қатысты барлық өнертабыстарды таратуға тыйым салынды. Ал Уильям Райх шәкірттерімен бірге оргон туралы жалған мәлімдемелер жасағаны үшін түрмеге қамалды.
