Дәлелсіз: «Тіс пастасындағы титан диоксиді тісті бұзады»
Интернетте тіс пастасынан тіс эмалін жейтін химиялық элемент табылғандығы туралы ақпарат талқылануда. Француз ғалымдары зерттеу жүргізіп, титан диоксиді адам үшін у екенін дәлелдеген екен. Бұл рас па, анықтайық.
Титан диоксиді немесе E171 тағамдық қоспасы қыздырғанда сарғаятын түссіз кристал түрінде болады. Ол тамақ, косметика және жеңіл өнеркәсіптің басқа салаларында белсенді қолданылады. Бұл компонент әртүрлі тағамдарға ақ түс беру үшін қолданылады. E171 ақ кондитерлік кремдерде, помадаларда, кәмпиттерде, сондай-ақ косметика мен тіс пастасында кездеседі.
Әлеуметтік желілерде титан диоксиді қауіпті және оны қолданбау керек деген хабарламалар бірнеше рет тарады. Кейбір қолданушылар бет маскаларында, кәмпиттерде және гигиеналық тампондарда болатын бұл зат қатерлі ісік тудыруы мүмкін деп мәлімдеді. Алайда, оның ешқайсысы расталған жоқ.
Видеода егеуқұйрықтарда жүргізілген тәжірибе жайлы айтылады. Ол титан диоксиді тоқ ішекте қатерлі ісікке дейінгі жасушаларды тудыруы мүмкін екенін көрсетті. Ғалымдар бұл зерттеуді сынға алды. Олар біраз деректерді бағалағаннан кейін титан диоксидінің геноуыттылығы (ДНҚ-ны зақымдау мүмкіндігі) расталмайды деген қорытындыға келді. Ықтимал әсерлер ДНҚ-ның тікелей зақымдалуына емес, жасушалардың жалпы стрессіне байланысты.
2021 жылы Еуропалық азық-түлік қауіпсіздігі басқармасы (EFSA) өз есбінде E171 қауіпсіздігіне күмән келтіреді. Нәтижесінде Еуропалық Одақта оған тыйым салынды. Алайда, 2022 жылдың қарашасында Еуропалық Одақтың Бас соты титан диоксидінің канцерогенділігі туралы шешімді жойды.
Ұлыбританияда Азық-түлік стандарттары агенттігі (FSA) EFSA қорытындыларын тексере бастады. 2022 жылдың қаңтарында аралық қорытынды жарияланды. Құжатқа сәйкес, ұсынылған дәлелдер жалпы EFSA тұжырымдарын қолдамайды, E171 қаупі дәлелденбеген.
АҚШ-тың Азық-түлік және дәрі-дәрмек сапасын қадағалау басқармасы (FDA) да титан диоксидінің қауіпсіздігін бағалады. Қорытынды: E171 қоспасы тамақ өнімдерінде, дәрі-дәрмектерде, косметикада және күннен қорғайтын өнімдерде қолданған кезде қауіп төндірмейді.
Титан диоксидінің тағамдағы қауіпсіздігін Канаданың Денсаулық сақтау министрлігі де растады. 2022 жылғы есепте Азық-түлікті бақылау басқармасы титан диоксидін қолданумен байланысты денсаулыққа қатысты маңызды проблемаларды таппағанын айтты.
Тіс пастасындағы титан диоксиді тіс эмалін бұзатынын немесе қатерлі ісік тудыратынын растайтын маңызды ғылыми дәлелдер жоқ. Ол пастаға ақ түс беру үшін ғана қолданылады. Көптеген халықаралық органдар, соның ішінде EFSA, FDA және Канаданың Денсаулық сақтау министрлігі оның тамақ пен косметикадағы қауіпсіздігін растады.
