Фейк: «Косметикаға магнит пен графен қосады»
Қазақстандықтар Instagram-да қызықты видеоны талқылауда. Онда қыздар ерін далабын ашып, косметикалық құралдың ағып, шашырағанын көрсетеді. Желіде пікір білдірушілердің айтуынша, бұл өнімге жасырын түрде графен немесе магнит қосатындықтан болады. Бұл жалған.
Ерін далабының «гравитацияны еңсеретінін» Желі қолданушылары 2020 жылы байқаған. TikTok әлеуметтік желісінде осы тақырып бойынша эксперименттер ұсынылған видеолар көп. Айта кетейік, видеода көрсетілген «гравитацияға қарсы» косметика бір ғана компанияның – Kylie Cosmetics өнімі. Демек, барлық эксперименттердегі аппликаторлар мен бөтелкелердің формалары да бірдей.
Шын мәнінде, бұл әсерді физикамен толықтай түсіндіруге болады. Бұған графен мен магниттердің қатысы жоқ.
Ерін далабымен тәжірибе жасаған қыздар оны ұдайы нақты бір жолмен ашады: аппликаторды шығармас бұрын, олар аппликаторды барынша салып, күрт алып шығады. Бұл ретте кейбір ерін далаптарының құрамында қалайы оксиді болатынын айта кеткен жөн, ол өнімнің тұтқырлығын бақылауға көмектеседі және оны жылтыр етеді. Аппликатордың пішіні мен шишаның көлемі де маңызды. Егер осы айнымалылардың барлығы сәйкес келсе, онда аппликаторды қозғалтқанда сыйымдылықтың мойнында статикалық электр энергиясы пайда болады. Яғни, аппликаторды алып шыққанда магнит өрісі туындайды, нәтижесінде ерін далабы аппликатордан шишаға қайта тамады, өйткені бұл заттардың арасында магнит өрісі бар.
Ұлыбританиялық ғылымды насихаттаушы Стив Молд статикалық электр энергиясы ерін жылтыратқышын «гравитацияны бұза» алатынын анық көрсетті. Ол үшін ол электродты ерін далабының аппликаторына тікелей қосып, алған әсерді видеоға түсірген.
Бұл ерін далабына жасырын түрде магнит немесе графен қоспайтынын білдіреді. Кеңінен таралған роликтерде көрсетілген ерекше әсерді физикамен түсіндіруге болады, оны бірқатар шартты сақтай отырып, қайталауға болады.
