Фейк: «Жапон профессоры вакциналар иммунитетті басады деп мәлімдеді»
Қазнет қолданушылары Жапонияның Киото университетінің құрметті профессоры COVID-19 қарсы вакциналар иммунитетті басады деп мәлімдегені туралы жазуда. Бұл мәлімдемені талдап, оның неге шындыққа жанаспайтынын түсіндірейік.
Хабарламада Масанори Фукусима есімді профессор туралы айтылады. Мұндай есімді ғалым бар. Ол Кобе биомедициналық зерттеулер қорының мүшесі және Киото университетіндегі трансляциялық өзін-өзі зерттеу жобасының тең авторы. Желіде профессор Фукусима жариялаған 200-ден астам ғылыми жұмысты табуға болады. Олардың біреуі ғана пандемияға арналған. Ол «COVID-19 патогенезі, болжамды факторлар және емдеу стратегиясы: шұғыл нұсқаулар» деп аталады. Бұл еңбектің толық мәтіні баршаға қол жетімді. Онда COVID-19 қарсы вакцинация туралы және екпелер иммунитетті басатыны туралы ештеңе айтылмаған.
Доктор Фукусиманың осындай мәлімдеме жасағаны туралы тек сенімсіз порталдар ғана хабарлайды. Оның вакциналардың «қауіптілігі» туралы дәйексөздері бұқаралық ақпарат құралдарында да, ғылыми әдебиеттерде де жоқ. Бұл келтірілген дәйексөздің жапон тілінен дұрыс аударылмаған және контекстен үзіп алынған деген күмән тудырады.
Сонымен қатар COVID-19 қарсы вакциналар иммунитетті әлсіретпей, күшейтетіні бұрыннан дәлелденген. Бұл рецензияланған ғылыми зерттеулермен расталады.
Осылайша, Қазнетте таралған хабарлама дәлелсіз. Профессор Фукусиманың екпелер иммунитетті басатыны туралы мәлімдегеніне ешқандай дәлел жоқ. Мұндай мәлімдеме дәлелденген ғылыми дәлелдерге қайшы келеді және фейк болып табылады.
