Астананың жаяу жүргіншілер бағдаршамдары химиясыз тазартылады
Астанада жаяу жүргіншілер өткелдерінде байланыс (шақыру) бағдаршамдарын тазалау жұмыстары жүргізілуде. Қазақстандық блогерлердің бірі өзінің Telegram-арнасында оның видеосын жариялады. Пост авторының пайымдауынша, өңдеу үшін химиялық заттар қолданылады. Видео астынан пікір жазған пайдаланушылар бұл сұйықтықтар улы болуы ықтимал дейді.
Бұл видеоға қатысты Астана әкімдігінің баспасөз қызметі түсініктеме берді.
«Бағдаршамдарды, жол белгілерін және жаяу жүргіншілер қоршауларын жуу үшін ыстық су толтырылған сыйымдылығы бар жуу машинасы (борттық «Газель») қолданылады. Суға химиялық заттар қосылмайды.
Тазарту жұмыстары жоғары қысымды аппаратты қолдана отырып, судың күшті қысымымен жүзеге асырылады, бұл қиын тазартылатын беттердегі ластануды жоюға мүмкіндік береді. Бағдаршам объектілерін жуу кезінде қажет болған жағдайда автобаған пайдаланылады.
Қыста жол қозғалысы қауіпсіздігі үшін бағдаршамдарды дұрыс және ұқыпты күйде ұстау үшін тиісті жұмыстар жалғасады», – делінген Астана әкімдігі баспасөз қызметінің ресми хабарламасында.
